what you have experienced, no power on earth can take from you
Viktor E. Frankl
Daar wag ‘n baie opwindende nuwe hoofstuk in my lewe. Dit is ‘n storie vir ‘n ander dag. Ek is besig om my lewe in bokse te pak om ou drome vlerke te gee.
So kom ek op al my joernale af. Dit is vir my so kosbaar, dat ek dit bymekaar gemaak het en in ‘n klein boksie apart ingepak het. Natuurlik begin ek toe analiseer hoekom ek skielik so ‘n ontsettende sentiment het aan hierdie hopie boeke.
Die buiteblaaie vertel hul eie storie. Daar was ‘n tyd waar ek net geloof gehad het, toe gebed, toe hoop.
Daarna breek die tyd aan waar ek gesoek het na self-waarde, genade of soos ek dit beter onderskei grace en mercy.
Dis waar ek besef het dat elke ondervinding betekenis gehad het en stadig maar seker die mens gevorm het wat ek vandag is. Daardie hartseer, hoop, ontevredenheid, vrae aan God was uniek aan my reis. Niemand kan dit ooit by my wegneem nie.
Alles vorm deel van my storie, my herhinneringe en my groei.
Een van my vriendinne het ‘n kosbare handgemaakte joernaal vir my gemaak. Die lewe het vir haar te veel geraak en sy het haar eie lewe geneem. Ek het opgehou skryf in hierdie joernaal die dag van haar dood. Wat kan ek byvoeg of wegneem? Die boek sal my altyd aan haar herhinner.
Hierdie boeke het my vandag weereens laat besef dat die mens ‘n wonderlike vermoë het om veerkragtig (resilient) te wees, dat God ons die krag gee om sterk te staan deur die moeilikste tye in ons lewens. Dit is moontlik, maar moeilik om die human spirit te breek.
Ek weet God, die Heilige Gees en die kosbare Bloed van Christus het my gered. Dit het genesing gebring. Deesdae is my joernale vroliker en vol danbaarheid.
Ek wil nooit die reis vergeet nie. In een van hierdie joernale is ‘n lys waarvoor ek al 25 jaar bid. Ek sal dit soek en deel, sodat ek kan getuig van God se genade. Maar ek weet dat ek verstom staan want Hy het my mal gebede gehoor,
Vir die koorleier. Van Dawid. ‘n Psalm. Ek het gesmag na die hulp van die Here. Hy het na my toe afgebuig en my hulpgeroep gehoor. Hy het my uitgetrek uit die put van die dood, uit die slymerige modder, my op ‘n rots laat staan en my weer op vaste grond laat loop.
PSALMS 40:1-17 AFR83
Ek het hierdie joernaal van 2000 sommer uit nuuskierigheid oopgeslaan en kyk die plesier wat dit my vandag gee!
Lank voordat ek geweet het van junk journaling het ek een gemaak sommer so in my dagbeplanner.
As ek nie my gebede neergeskryf het nie sou ek nooit geweet het hoeveel daarvan God verhoor het nie.
Leave a comment